Робиъул-аввал ойининг 18-куни
- Ҳижрий 227-йил 18-робиъул-аввал куни (милодий 842-йил 5-январ) Аббосийлар давлатининг 8-халифаси Муътасим-Биллаҳ ибн Ҳорун Ар-Рошид вафот этди. Унинг ўрнини ўғли Восиқ-Биллаҳ эгаллади.
- Ҳижрий 665-йил 18-робиъул-аввал куни (милодий 1267-йил 17-декабр) Салоҳиддин давридан бир аср ўтиб, Миср султони Зоҳир Бепрос даврида “Азҳар” жоме масжидида яна жума намози ўқилди.
- Ҳижрий 1342-йил 18-робиъул-аввал куни (милодий 1923-йил 30-октябр) Усмонлилар империяси Республика деб эълон қилинди ва Мустафо Камол Отатурк Туркия Республикаси президенти этиб сайланди. Бу – Иломий давлатнинг буткул йўқ бўлишидан дарак эди.
Хайбар ғазоти, шубҳасиз, мусулмонлар учун катта зафар бўлди. Хайбардаги яҳудийлар ўзларининг ҳарбий қувватлари, бойликлари, фаровонликлари, серҳосил зироатлари, ҳайвонот бойликлари, қурол-аслаҳалари, метин қўрғонлари билан машҳур эдилар. Шунингдек, уларнинг ичида машҳур доҳийлар ва Марҳоб ҳамда Ҳорис ибн Абу Зайнаб каби паҳлавонлар ҳам кўп эди. Ҳеч ким, хусусан, ўша минтақадаги қабилалар уларни енгилади, деб хаёлларига ҳам келтирмас эдилар. Мусулмонларнинг ана шундай кучга эга тарафни мағлуб этишлари мазкур устунликларнинг ҳаммаси улар томонга ўтганини, яқин ўртада мусулмонларга тенг келадиган куч қолмаганлигини билдирар эди. Бу эса атрофда тарозининг палласи қайси томонга оғишини кутиб турган кўплаб қабилаларнинг мусулмонлар томонига мойил бўлишини таъминлар, бошқаларнинг кўнглини қўрқинчга тўлдирар эди. Хайбар ғазотидаги зафар мусулмонларнинг ўзларига ҳам янги куч бахш этарди. Улар шу қадар катта қувватга эга бўлган душманни мағлуб этганларидан кейин бошқа душманларга қарши кураш осон бўлишини тушуниб етар эдилар. Кейинги ҳодисалар айни шу ҳолатни тасдиқлади. Хайбар фатҳидан кейин бирин-кетин бошқа фатҳлар мусулмонларга ёр бўла бошлади.
